Jack:「可以一战嘅帮派作品」《MAFIA III》美国行

  • 作者:
  • 时间:2020-06-07
Jack:「可以一战嘅帮派作品」《MAFIA III》美国行

呢一轮如果你问有乜新Game玩,数落真係清一色运动game居多:《FIFA 17》、《NBA 2K17》、《PES 2017》等等,对于一班锺意玩波嘅玩家嚟讲当然开心,但如果你唔好此道嘅,呢期是咪可以熄机?当然唔係啦,嚟紧2K发行嘅《MAFIA III》就係一只唔再玩波嘅作品,只game值唔值得追入呢?等我为大家娓娓道来。

无啦啦行古惑

讲起同帮会有关嘅游戏,好多人当然先谂起《GTA》,跟住呢?跟住呢?以意大利帮会组织「黑手党」为名打正旗号嘅《MAFIA》会係另一个选择。早前我就去咗日本参加2K举办嘅《MAFIA III》试玩会,玩咗6粒钟,当然係有返唔少心得。嚟到第三集,首先会有人问:「我冇玩过前两集的话,我而家先玩会唔会唔知头唔知路呢?」我可以好肯定咁答你:唔会!虽然今集係会有上集嘅角色出现,但其实都係NPC嚟,同故事冇太大影响,而且今集个主角亦都係新登场,故事发生舞台亦係新地点,所以大家可以当佢係一个全新故仔去玩都冇所谓。至于有玩开前两集嘅玩家,因为有部分旧角色係会出现,见返佢哋係会有种亲切感。

咁究竟只game讲乜?简单讲句就係行古惑。故事发生嚮60年代,美国刚打完越战,主角就係一位从越南返嚟嘅退役军人,返到佢家乡新波尔多,见返班老友同乡亲父老当然开心,去到呢个位大家应该估到,个剧情就係好老土地讲主角因为帮朋友而无啦啦涉入帮会活动啦,至于继后点发展就唔剧透喇,我唔想死全家。

Jack:「可以一战嘅帮派作品」《MAFIA III》美国行
◆ 试玩会当日玩嘅係PS4版本,每人一部机,玩足6粒钟。Jack:「可以一战嘅帮派作品」《MAFIA III》美国行
◆ 呢堆Decoration係正嘅,可惜拎唔到返嚟送俾大家。Jack:「可以一战嘅帮派作品」《MAFIA III》美国行
◆ 主角林肯,美国黑人,刚从越南退役返到家乡。

Jack:「可以一战嘅帮派作品」《MAFIA III》美国行
◆ 游戏故事舞台设定于新波尔多,其实係参照60年代嘅新奥尔良实景去设计。 Jack:「可以一战嘅帮派作品」《MAFIA III》美国行
◆ PS4版画面係点?呢两张screen cap或者可以解答到你呢个疑问。真係想有靓画面,玩PC版是常识吧?

Playboy与海报

咁玩啲乜呢?好老实真係好难唔搵《GTA V》同佢比,因为大家都係以「开放式世界」(Open world)为卖点,内容主题又类似。咁我玩起上嚟又确係非常之《GTA V》,不过去到战斗嗰阵就有唔同,我个人觉得《MAFIA III》个射击系统比《GTA V》「平易近人」好多,易上手之余亦冇咁难瞄,係舒服嘅。

咁只Game又有冇《GTA V》咁多内容咁多嘢玩先?老老豆豆只《MAFIA III》一定冇《GTA V》呢只神作咁多搞作,完全係故仔致胜。而据《MAFIA III》製作人Denby Grace透露,单玩主线唔强迫做晒所有收集住务的话,都有差唔多廿个小时Playtime,今时今日嘅Game有呢个时数嘅Playtime已经非常之唔错,算係抵玩。不过我好想提一提大家,游戏入面有两个收集元素其实係值得大家花时间去做,第一就係搵甜味海报,第二就係搵《Playboy》!Denby话呢两样嘢真係搵返60年代嘅真《Playboy》入面嘅Playboy女郎及甜味海报,所有相无遮无掩无删剪原汁原味再现,我搵到几本,都几爽皮下架!

Jack:「可以一战嘅帮派作品」《MAFIA III》美国行
◆ 揸枪四围射係必备元素。Jack:「可以一战嘅帮派作品」《MAFIA III》美国行
◆ 不过更多时间其实係要玩暗杀。Jack:「可以一战嘅帮派作品」《MAFIA III》美国行
◆ 当然飞车追逐亦少不免啦。Jack:「可以一战嘅帮派作品」《MAFIA III》美国行
◆ 爆锁破门係指定动作,其实亦係Mini Game。Jack:「可以一战嘅帮派作品」《MAFIA III》美国行
◆ 我唔会扮君子,我认我因为《Playboy》同海报要丧做收集任务。Jack:「可以一战嘅帮派作品」《MAFIA III》美国行
◆ 游戏个地图其实好大,我玩咗6粒都只係开到呢到咁多嘢。

双眼无神

当然只game并非绝对无敌,梗係会有啲唔妥。或者可能我玩嘅未係最终完成品,可能大家玩时未必会出现我以下讲嘅情况:我觉得《MAFIA III》最大问题係玩法有啲寡。好多时靠硬闯係唔work,必须要靠潜入或静静咁将敌人除去,但个过程就有啲闷,而且好多时班A.I.敌人个盲点好似五蚊银咁大,嚮佢哋5米前行过佢哋竟然毫无反应!喂我已经係玩Hard Mode喇喎,如果我玩Normal会唔会直头当我透明?

除此之外,我个人觉得《MAFIA III》个画质并唔係话十分之正,我玩PS4版,有唔少位係发现有偷格,Texture及贴图方面亦见到有唔足料嘅地方。游戏入面所有人物嘅表情係足够,细緻度高,口形亦对到VO,唯独眼神出事,全部人对眼都係无神嘅,即係好似死鱼眼咁,我唔太接受到。

Jack:「可以一战嘅帮派作品」《MAFIA III》美国行
◆ 游戏入面啲角色全部都係死角眼,要闹!Jack:「可以一战嘅帮派作品」《MAFIA III》美国行
◆ 嚮呢个地方吹口哨就可以引到大佬过来静静咁杀佢,喂会唔会太过儿戏?Jack:「可以一战嘅帮派作品」《MAFIA III》美国行
◆ 大摇大摆行到咁近先匿埋都睇我唔到,究竟係你哋班人盲定係我太劲?

Talk with producer

试玩Game后,我有机会同Denby倾咗一阵,当时我把握机会问佢只Game嘅嘢啦!大家就係点解会搞新奥尔良作为游戏入面新波尔多嘅蓝本呢?Denby就话新奥尔良係一个非常富有特色嘅地市,各色人种以及文化共冶一炉,彼此之间嘅冲突更可为故事加入唔少内容;除此以外,好似冇同类型游戏係以新奥尔良作为故事舞台,所以佢哋就决定《MAFIA III》发生嚮呢个南方大城市。去到呢个位我就奇怪,咁点解唔嚮游戏入面直接叫新奥尔良,而以新波尔多呢个假名呢?Denby话唔用新奥尔良呢个名就係唔想大家将呢个城市嘅既有印象加诸游戏入面,我觉得呢个解释就等如冇解释,Hea我!

另一个我想知就係角色,点解今集会用一个黑人去做主角呢?Denby就话用黑人做主角有两个重大原因:其一就係唔想将黑手党主要由白人主导呢个印象框死自己;其二就係因应60年代嘅时代背景,当时黑人势力确係于美国抬头,用黑人做主角其实係反映当时现实。

唔讲你可能唔知,《GTA V》入面所有黑帮份子原来真係搵返洛杉矶当地嘅古惑仔去做VO,咁《MAFIA III》又有冇跟住做呢?Denby就话佢哋今次搵嘅配音员全部都係身家清白,全部都係专业嘅配音员。今次搵嘅配音员特登搵一班名气冇咁大嘅,原因唔係话冇Budget,而係想大家唔好因为配音员而将个角色定形,咁个又讲得通喎。

Jack:「可以一战嘅帮派作品」《MAFIA III》美国行

◆ Denby Grace(Executive Producer of《MAFIA III》),2005年加入2K,曾参与《MAFIA》、《MAFIA II》、《Max Payne》、《Prey》、《Spec Ops:The Line》以及《Evolve》等作品的製作。

《MAFIA III》

游戏开发:Hangar 13

游戏发行:2K Games

游戏类型:动作冒险

游戏人数:1人

游戏平台:PC / Mac OS / PS4 / Xbox One

游戏售价:$428

推出日期:10月8日

游戏网页

Jack:「可以一战嘅帮派作品」《MAFIA III》美国行